You are here

ദൈവത്തിന്റെപേരില്‍ യുദ്ധങ്ങള്‍ ഉണ്ടാക്കരുത്: മാര്‍പാപ്പ

വത്തിക്കാന്‍: ഇറാക്കിലും ഗാസയിലും ദൈവത്തിന്റെപേരില്‍ നടക്കുന്ന യുദ്ധങ്ങള്‍ നീതീകരിക്കാനാവാത്തതെന്നു മാര്‍പാപ്പ.

ഇറാഖിലെയും ഗാസയിലെയും ജനങ്ങള്‍ക്കുവേണ്ടി പ്രാര്‍ഥനാസഹായം അപേക്ഷിച്ച ഫ്രാന്‍സിസ് പാപ്പാ കഴിഞ്ഞയാഴ്ച ഉടനീളം ട്വീറ്റുകളിലൂടെ ഇറാക്കിലെ ജനതയ്ക്കുവേണ്ടി പ്രാര്‍ഥനാസഹായം അപേക്ഷിച്ചിരുന്നു.

ഇറാക്കിലെ സ്ഥിതിയെക്കുറിച്ചു പാപ്പ പറയുന്നു, ''ഇറാഖില്‍ നിന്നും ലഭിച്ച വാര്‍ത്തകള്‍ ഞെട്ടിക്കുന്നതും വിശ്വസിക്കാന്‍ കഴിയാത്തതുമായിരുന്നു. ക്രൈസ്തവരുള്‍പ്പെടെ ആയിരക്കണക്കിനു ജനങ്ങള്‍ അതിക്രൂരമായി പീഡിപ്പിക്കപ്പെട്ടു, പലായനം ചെയ്യപ്പെട്ടു; രക്ഷപ്പെടുന്നതിനിടയില്‍ കുഞ്ഞുങ്ങള്‍ വിശപ്പും ദാഹവുംകൊണ്ടു മരിച്ചു; സ്ത്രീകളെ തട്ടിക്കൊണ്ടുപോയി; എല്ലാത്തരത്തിലുള്ള ക്രൂരതകള്‍ അവിടെ സംഭവിച്ചു. വീടുകള്‍ തകര്‍ക്കപ്പെട്ടു. മതസ്വാതന്ത്ര‍്യം നിഷേധിക്കപ്പെട്ടു, ചരിത്രവും സാംസ്കാരികപരവുമായ പൈതൃകസ്വത്തുക്കള്‍ തകര്‍ക്കപ്പെട്ടു.'' യുദ്ധങ്ങളെ അപലപിച്ച അദ്ദേഹം, ''മാനവികതയ്ക്കും ദൈവത്തിനുമെതിരായ അവഹേളനമാണിത്. ദൈവത്തിന്റെ പേരില്‍ ഒരിക്കലും വിദ്വേഷവും വെറുപ്പും സൃഷ്ടിക്കരുത്. ദൈവത്തിന്റെ പേരില്‍ യുദ്ധങ്ങള്‍ ഉണ്ടാകുകയുമരുത്'' എന്നും പറഞ്ഞു. ഇസ്ലാംമതത്തിലേക്കു പരിവര്‍ത്തനം ചെയ്യാന്‍ വിസമ്മതിച്ച ക്രൈസ്തവരെ നാടുകടത്തുകയോ കൊല്ലുകയോ ചെയ്താണ് ഇസ്ലാംതീവ്രവാദികള്‍ പ്രതികാരം ചെയ്തത്. ബൈബിളില്‍ പരാമര്‍ശിച്ചിരിക്കുന്ന നിനവേ നഗരത്തിലും മൊസൂളിലുമാണ് ഇസ്ലാം സൈന‍്യം ആക്രമണം നടത്തിയിരുന്നത്. നിഷ്കളങ്കരായ കുഞ്ഞുങ്ങളെയും നിരപരാധികളെയും കൊന്നൊടുക്കുന്ന സംഘര്‍ഷം അവസാനിപ്പിക്കാന്‍ സഹായിക്കണമെന്നു ദേശീയ, അന്തര്‍ദേശീയ സംഘടനകളോടും നേതാക്കളോടും അദ്ദേഹം ആഹ്വാനംചെയ്തിരുന്നു.

Web Editor and Administrator : Sam Kondazhy Graphic Designer : Saji Naduvathra

©2014 GoodNews Weekly. All Rights Reserved